អង់គ្លេស៖ លោក Ole Gunnar Solskjaer បានជំរុញឲ្យតារាឆ្នើមៗក្នុងក្លិប Manchester United របស់លោក ដណ្តើមយកឱកាសមាសដើម្បីឈ្នះកៅអីទៅកាន់ក្របខ័ណ្ឌ Champions League ក្រោយពីខ្សែប្រយុទ្ធ Mason Greenwood បានជួយឲ្យពួកគេដណ្តើមបានលទ្ធផលស្មើ ១-១ ជាមួយនឹងក្រុម West Ham កាលពីថ្ងៃពុធ។ ក្រុមរបស់លោក Solskjaer បានរបូតគ្រាប់បាល់ ដោយសារតែការស៊ុតបាល់ប៉េណាល់ទីរបស់កីឡាករ Michail Antonio នៅតង់ទី១នាកីឡដ្ឋាន Old Trafford។
ប៉ុន្តែ ខ្សែប្រយុទ្ធវ័យក្មេង Greenwood បានស៊ុតបាល់បំប៉ោងសំណាញ់ទី១ ក្រោយពីសម្រាកតង់ទី១ ដើម្បីជួយឲ្យក្រុម Man United ឡើងទៅឈរក្នុងចំណាត់ថ្នាក់លេខ៣ នៅតារាង Premier League។ ពួកគេឡើងឈរពីលើក្រុមលេខ៤ Chelsea ដោយសារតែមានគ្រាប់បាល់ស៊ុតបញ្ចូលទីច្រើនជាង ក្រោយពីក្រុមតោខៀវ បានរងបរាជ័យក្នុងលទ្ធផល ៥-៣ នៅលើទឹកដីក្រុមម្ចាស់ជើងឯក Liverpool។
Man United នឹងបញ្ចប់ក្នុងចំណាត់ថ្នាក់កំពូលទាំង៤ ប្រសិនបើពួកគេដណ្តើមបានលទ្ធផលស្មើ ឬឈ្នះក្នុងការប្រកួតកាត់សេចក្តីជាមួយនឹងក្រុមឈរលេខ៥ Leicester City នៅថ្ងៃអាទិត្យ។ Man United កំពុងតែនាំមុខ១ពិន្ទុលើក្រុម Leicester មុននឹងឈានទៅកាន់ការប្រកួតចុងក្រោយរបស់ពួកគេ នៅរដូវកាលនេះ នាកីឡដ្ឋាន King Power។ លោក Solskjaer បានបញ្ជាក់ថា៖ «នៅពេលដែលយើងបានចាប់ផ្តើម ក្រោយពីការផ្អាក យើងត្រូវតែប្រជែងដណ្តើមយកវា។ យើងត្រូវតែរកគ្រាប់បាល់ឲ្យបានច្រើន យើងត្រូវតែដណ្តើមពិន្ទុឲ្យបានច្រើន។ យើងបានធ្វើឲ្យខ្លួនយើងមានឱកាសមាសក្នុងការប្រជែងយកពិន្ទុដ៏សំខាន់នៅថ្ងៃអាទិត្យ»៕
វីដេអូ៖
ប្រភពព័ត៌មាន៖ Channel News Asia
