លោក Jose Mourinho មិនទាន់មានការងារថ្មីតាំងពីខែធ្នូ ឆ្នាំ២០១៨ មកម្ល៉េះ ប៉ុន្តែអតីតអ្នកចាត់ការសញ្ជាតិព័រទុយហ្កាល់រូបនេះតែងតែជាប់រវល់នឹងការវិភាគបាល់ទាត់ និងការផ្ដល់បទសម្ភាសន៍ជានិច្ច។ នៅក្នុងបទសម្ភាសន៍មួយនាពេលថ្មីៗនេះ លោកបានឆ្លៀតចំអកឱ្យអតីតអ្នកចាត់ការក្លឹប Manchester United មួយរូបទៀតគឺលោក Louis van Gaal។
លោក Jose Mourinho បានចូលរួមជាភ្ញៀវនៅក្នុងកម្មវិធីរបស់គេហទំព័រ Joe.co.uk ដោយចូលរួមលេងល្បែងកំសាន្ដមួយដែលគាត់ត្រូវទាយថាសម្ដីមួយដែលគេលើកឡើងជាសម្ដីរបស់តារាភាពយន្ដ ឬជាសម្ដីរបស់អ្នកចាត់ការក្លឹបបាល់ទាត់។ សម្ដីដំបូងដែលគេលើកឡើងឱ្យលោក Mourinho ទាយជាសម្ដីរបស់លោក Van Gaal។ អតីតអ្នកចាត់ការសញ្ជាតិហូឡង់រូបនេះបានដឹកនាំក្រុមបិសាចក្រហមមុនលោក Mourinho ហើយត្រូវបានដកចេញពីតួនាទីក្រោយដឹកនាំបាន ២ឆ្នាំ។ សម្ដីដែលត្រូវបានលើកឡើងឱ្យអតីតអ្នកចាត់ការដែលធ្លាប់ឈ្នះពានរង្វាន់ឆេមពានលីគ២ជំនាន់រូបនេះទាយគឺ៖ “ពេលដែលខ្ញុំគិតថាខ្ញុំបានបង្កើតកំហុស វាធ្វើឱ្យខ្ញុំដេកមិនលក់នោះទេ ប៉ុន្តែស្ថានភាពនេះកម្រនឹងកើតឡើងណាស់”។
គ្រាន់តែបានអានសម្ដីនេះរួចភ្លាម លោក Mourinho បានឆ្លើយតបភ្លាមៗថា៖ “នេះជាសម្ដីរបស់អ្នកចាត់ការ! មនុស្សដែលឱ្យតម្លៃខ្លួនឯងសំខាន់យ៉ាងនេះ មានតែអ្នកចាត់ការក្លឹបបាល់ទាត់ទេ”។ នៅពេលដែលគេប្រាប់ថាគាត់ឆ្លើយបានត្រឹមត្រូវ ហើយនេះជាសម្ដីរបស់លោក Louis van Gaal អតីតអ្នកចាត់ការក្លឹប Manchester United រូបនេះបាននិយាយថា៖ “អូ ទំនងហើយ”៕
