អ្នកចាត់ការទូទៅក្រុមក្រសួងការពារជាតិ (ទ័ព) លោក ទេព ឡុងរចនា បានប្រាប់ថា ក្រុមរបស់លោក នឹងពង្រឹងតំបន់ការពារឲ្យបានខ្លាំងជាងមុន គឺដើម្បីទប់ការប្តូររកគ្រាប់បាល់របស់ក្រុមអាស៊ីអឺរ៉ុប សម្រាប់ការប្រកួតកាត់សេចក្តីជើងទី២ វគ្គជម្រុះ១៦ក្រុមនៃពានរង្វាន់សម្តេច ហ៊ុន សែន លើកទី១៣ ឆ្នាំ២០១៩ នៅថ្ងៃពុធនេះ ប៉ុន្តែក្រុមសូលទីឡូអង្គរ ត្រូវបានគេមើលឃើញថា នឹងអាចត្រូវទម្លាក់ក្រុមខេត្តរតនគិរី នៅថ្ងៃនេះ ដោយគ្មានអ្វីត្រូវប្រែប្រួលនោះទេ។

ក្រុមអាស៊ីអឺរ៉ុប បានចាញ់ក្រុមទ័ព ៣-១ កាលពីប្រកួតជើងទី១ នៅលើទឹកដីខ្លួនឯង ហេតុនេះការប្រកួតក្រុមម្ចាស់ផ្ទះទ័ព នៅកីឡដ្ឋានស្តាតចាស់ នាល្ងាចម៉ោង៦ ថ្ងៃពុធនេះ លោក សុក វាសនា គ្រូបង្វឹកក្រុមអាស៊ីអឺរ៉ុប បានកំណត់យ៉ាងច្បាស់ថា ក្រុមរបស់លោក នឹងលេងប្តូរ ដើម្បីរកគ្រាប់បាល់មកវិញ។
លោក សុក វាសនា បានប្រាប់ថា៖ «យើងនៅមិនទាន់អស់សង្ឃឹមទេ ព្រោះយើងនៅសល់ការប្រកួត៩០នាទីពេញ នៅជើងទី២នេះទៀត ហើយនេះជាពេល ដែលយើងត្រូវតែប្តូរ ដើម្បីរកគ្រាប់បាល់ ព្រោះបើយើងរកបាន២គ្រាប់ គឺយើងអាចនឹងថែមម៉ោងបានហើយ»។

គ្រូបង្វឹករូបនេះ បានបន្ថែមថា៖«ការហ្វឹកហាត់មិនបានជុំគ្នា ដោយសារកីឡាករមួយចំនួនជាប់រវល់ធ្វើការងារ វាជាការលំបាកមួយសម្រាប់ពួកយើងផងដែរ ប៉ុន្តែយើងគ្មានការលេងទប់អីទៀតនោះទេ ហើយយើងក៏លែងគិតពីលទ្ធផលចាញ់ទៀតដែរ គឺសំខាន់យើងត្រូវវាយលុករកគ្រាប់មកវិញ»។ យ៉ាងណាក៏ដោយ លោក ទេព ឡុងរចនា បានដឹងមុនទៅហើយថា ក្រុមអាស៊ីអឺរ៉ុប នឹងប្រើការវាយសម្រុក មកលើក្រុមទ័ព សម្រាប់ការប្រកួតលើកនេះ ព្រោះពួកគេគ្មានជម្រើសផ្សេង ក្រៅពីការធ្វើបែបនេះនោះទេ ប៉ុន្តែអ្នកចាត់ការទូទៅរូបនេះ មានការជឿជាក់ថា ទ័ព នឹងនៅតែអាចយកឈ្នះអាស៊ីអឺរ៉ុប ដើម្បីឡើងទៅវគ្គបន្ត។

លោក ទេព ឡុងរចនា បានប្រាប់ កាលពីថ្ងៃអង្គារថា៖«ពួកគេត្រូវតែលេងបែបនេះ ហេតុនេះយើងត្រូវតែពង្រឹងតំបន់ការពារឲ្យបានរឹងមាំជាងមុន ព្រោះមហិច្ឆតារបស់យើង មិនត្រឹមតែយកឈ្នះក្រុមអាស៊ីអឺរ៉ុប ប៉ុណ្ណោះទេ ប៉ុន្តែយើងត្រូវឆ្ពោះទៅរកការឈ្នះពាន បន្តទៀត គឺពេលនេះ ក្រុមទ័ព បានបង្វែការយកចិត្តទុកដាក់ខ្លួន លើការប្រកួតពានសម្តេច ហ៊ុន សែន ខ្លាំងបំផុត ដ្បិតអីការប្រជែងយកពាន នៅលីកកំពូលកម្ពុជា នៅឆ្នាំនេះ យើងរាងនៅឆ្ងាយពីគេហើយ»។

ចំណែកក្រុមខេត្តរតនគិរី បានយកកីឡដ្ឋានអាស៊ីអឺរ៉ុបស្ពតផាក ជាកន្លែងប្រកួតកាត់សេចក្តីជាមួយក្រុមសូលទីឡូអង្គរ ដែលនឹងត្រូវធ្វើនៅរសៀលម៉ោង ៣:៣០ ថ្ងៃពុធនេះដែរ ប៉ុន្តែក្រុមរតនគិរី បានដឹងខ្លួនឯងរួចទៅហើយថា ពួកគេនឹងធ្លាក់ចេញពីការប្រកួតនេះ ព្រោះការចាញ់ក្រុមសូលទីឡូអង្គរ ១០-១ កាលក្នុងជើងទី១ វាបានកំណត់ជោគវាសនាពួកគេរួចទៅហើយ ហើយលើកនេះ ក៏ពួកគេ មិនអាចគេចផុតពីការបន្តចាញ់ក្រុមសូលទីឡូអង្គរ ទៀត នោះដែរ៕