ក្លិប Real Madrid បានបញ្ជាក់កាលពីថ្ងៃអង្គារថា ពួកគេបានចុះហត្ថលេខាជាមួយនឹងខ្សែប្រយុទ្ធអន្តរជាតិស៊ែប៊ីវ័យ២១ឆ្នាំ Luka Jovic ពីក្លិបអាល្លឺម៉ង់ Eintracht Frankfurt ក្នុងកិច្ចសន្យារយៈពេល៦ឆ្នាំ សម្រាប់តម្លៃខ្លួនបិទជិតមួយ។

ក្លិប Real បានឲ្យដឹងក្នុងសេចក្តីថ្លែងការណ៍មួយថា៖ «ក្លិប Real Madrid និង Eintracht Frankfurt បានព្រមព្រៀងគ្នាដើម្បីផ្ទេរ Luka Jovic ដោយរង់ចាំតែការត្រួតពិនិត្យសុខភាពប៉ុណ្ណោះ។ កីឡាកររូបនេះ នឹងស្ថិតក្នុងក្លិបនេះ សម្រាប់រយៈពេល៦រដូវកាល រហូតដល់ថ្ងៃទី៣០ ខែមិថុនា ឆ្នាំ២០២៥»។ Jovic បានស៊ុតបាល់បញ្ចូលទី២៧គ្រាប់ ក្នុងរាល់យុទ្ធនាការទាំងអស់នៅរដូវកាលនេះ ដោយបានជួយឲ្យក្រុម Frankfurt ឈានទៅកាន់ការប្រកួតក្របខ័ណ្ឌ Europa League វគ្គពាក់កណ្តាលផ្តាច់ព្រ័ត្រ និងបញ្ចប់ដោយការឈរលេខ៧លើតារាងក្រខ័ណ្ឌ Bundesliga។

រូបគេក៏បានបង្ហាញខ្លួនជាអន្តរជាតិ៤លើកសម្រាប់ក្រុមជម្រើសជាតិស៊ែប៊ីផងដែរ ដោយបានស៊ុតបាល់បញ្ចូលទី១គ្រាប់។ ទម្រង់លេងយ៉ាងល្អរបស់គេ បានធ្វើឲ្យរូបគេស្ថិតក្នុងរ៉ាដារបស់ក្លិបធំៗនៅអឺរ៉ុបជាច្រើន ខណៈដែលបណ្តាញសារព័ត៌មានរបស់អេស្ប៉ាញ បានបង្ហើបថា ការផ្ទេរនេះអាចនឹងមានតម្លៃខ្លួន៦០លានអឺរ៉ុប (ស្មើនឹង៦៧លានដុល្លារអាមេរិក) ខណៈដែលបណ្តាញសារព័ត៌មានអាល្លឺម៉ង់ បានបញ្ជាក់ថា ក្លិប Real នឹងចំណាយប្រាក់៧០លានអឺរ៉ូ។

លោក Fredi Bobic ប្រធានផ្នែកកីឡារបស់ក្លិប Frankfurt មិនបានបង្ហាញពីសេចក្តីលម្អិតផ្នែកហិរញ្ញវត្ថុឡើយ ប៉ុន្តែ បានបញ្ជាក់ថា កញ្ចប់ថវិកាដែលក្លិប Real ផ្តល់ឲ្យ ពិតជាលំបាកក្នុងការមិនទទួលយក។ លោកបានឲ្យដឹងក្នុងសេចក្តីថ្លែងការណ៍មួយថា៖ «ក្នុងលក្ខខណ្ឌកីឡា Luka Jovic គឺជាការបាត់បង់ដ៏ធំមួយសម្រាប់យើង»៕
ប្រភពព័ត៌មាន៖ Channel News Asia