ខ្សែប្រយុទ្ធ Barcelona កីឡាករ Luis Suarez ត្រូវបានបញ្ចូលក្នុងក្រុមជម្រើសជាតិអ៊ុយរូហ្គាយទាំង២៣រូប សម្រាប់ការប្រកួត Copa America។ គ្រូបង្វឹកលោក Oscar Tabarez នឹងដឹកនាំក្រុមជើងខ្លាំងមកពីតំបន់អាមេរិកឡាទីន ជាលើកទី៦ ហើយ Suarez និងចូលរួមជាមួយកីឡាករជើងចាស់ជាច្រើនដូចជា Suarez, Edinson Cavani និង Diego Godin ជាដើម។

ទោះជាយ៉ាងណាក៏ដោយ Suarez នៅតែជួបនៅរឿងមន្ទិលសង្ស័យចំពោះការប្រកួតខណៈ ដែលរូបគេកំពុងតែងើបពីការវះកាត់នៅលើជង្គង់ស្ដាំរបស់គាត់។ មានកីឡាករតែម្នាក់គត់ដែលមកពីលីកក្នុងស្រុករបស់អ៊ុយរូហ្គាយ ត្រូវបានរួមបញ្ចូលនោះគឺខ្សែបម្រើកណ្តាលវ័យ ២៤ឆ្នាំរបស់ក្លិប Penarol ឈ្មោះ Giovanni Gonzalez។

អ៊ុយរូហ្គាយបានឈ្នះពាន Copa America 15ដង និង អាហ្សង់ទីន ១៤ដង ខណៈពេលដែលម្ចាស់ផ្ទះប្រេស៊ីលធ្លាប់ឈ្នះតែ ៨ដងប៉ុណ្ណោះ។ ការប្រកួតលើកដំបូងរបស់អ៊ុយរូហ្គាយនឹងប្រព្រឹត្តទៅនៅថ្ងៃទី១៦ ខែមិថុនា ខាងមុខជាមួយអេក្វាឌ័រ ឈីលីនិងជប៉ុនស្ថិតនៅក្នុងពូល C។