លោកបារ៉ាក់អូបាម៉ា កាលពីថ្ងៃអង្គារបានថ្លែងសុន្ទរកថានៅក្នុងសន្និសិទ EXMA នាទីក្រុងបូកូតាប្រទេសកូឡុំប៊ីដោយបានបង្ហាញពីអារម្មណ៏យល់ឃើញ និងផ្តល់យោបល់ទាក់ទង និងក្រុមជម្រើសជាតិអាហ្សង់ទីន។ អតីតប្រធានាធិបតីសហរដ្ឋអាមេរិកបាននិយាយដល់ឈ្មោះតារាឆ្នើមក្រុមជម្រើសជាតិអាហ្សង់ទីនគឺ Lionel Messi ដោយពន្យល់ថា: នៅប្រទេសអាហ្សង់ទីនទោះបីជា Messi អស្ចារ្យក៏ដោយពួកគេមានបញ្ហាក្នុងការឈ្នះពានរង្វាន់បាល់ទាត់ពិភពលោក។

សូម្បីតែកីឡាករដែលមានទេពកោសល្យល្អបំផុតនៅលើវាលស្មៅ របស់ពួកក៏គេមិនអាចជួយអ្វីគ្រប់យ៉ាងដោយខ្លួនឯងបាននោះដែរ។ មានន័យថាទោះបីជាមានកីឡាករម្នាក់ល្អបំផុតលើ ពិភពលោកកំពុងស្ថិតក្នុងក្រុមគឺ Messi ក៏ដោយក៏អាហ្សង់ទីនខកខានក្នុងការឈ្នះ ពីព្រោះពួកគេលេងដោយខ្វះការសាមគ្គីក្នុងក្រុម ហើយលេងមិនមានឆន្ទៈបង្រួបបង្រួមគ្នាជាធ្លុងមួយឡើយ។ ដំបូន្មានរបស់ខ្ញុំចំពោះយុវជន គឺថាយើងត្រូវទទួលស្គាល់មនុស្សតិចតួចណាស់ដែលសម្រេចបាននូវអ្វីៗដ៏អស្ចារ្យដោយខ្លួនឯង។

មតិយោបល់លើកឡើងរបស់លោកអូបាម៉ាធ្វើឡើងនៅពេលដែល Messi ទៅដល់ទីក្រុង Buenos Aires ប្រទេសអាហ្សង់ទីនដើម្បីចាប់ផ្តើមការត្រៀមរៀបចំហ្វឹកហាត់និងចូលរួមការប្រកួត Copa America ២០១៩ ដែលចាប់ផ្តើមនៅក្នុងប្រទេសប្រេស៊ីលក្នុងនាមជាម្ចាស់ផ្ទះនៅខែក្រោយនេះ។ គួររំលឹកឡើងវិញផងដែរថា Messi បានជួយក្រុមអាហ្សង់ទីនទៅបន្តការប្រកួតវគ្គផ្តាច់ព្រ័ត្រ World Cup ២០១៨ នៅប្រទេសរុស្សី ប៉ុន្តែបានធ្លាក់ចេញត្រឹមវគ្គ ១៦ក្រុមចុងក្រោយ បន្ទាប់ពីបរាជ័យក្រោមថ្វីជើងម្ចាស់ជើងឯកបារាំងក្នុងលទ្ធផល ៤:៣។

សំរាប់ខ្លួនលោកផ្ទាល់ Obama និងគ្រួសារក្នុងអំឡុងពេលលោកកាន់តំណែងជាប្រធានាធិបតីនិងចាប់តាំងពីចាកចេញពីសេតវិមាននៅក្នុងឆ្នាំ២០១៧ ប្រធានាធិបតីស្បែកខ្មៅដំបូងគេរបស់ប្រទេសមហាអំណាចតែងតែបង្ហាញពីការកោតសរសើររបស់គាត់ចំពោះ Messi គាត់បាននិយាយថាកូនៗ របស់គាត់គឺជាប្រិយមិត្តអ្នកគាំទ្រម្ចាស់ពានបាល់មាស ៥ដង និងជាកីឡាករលេងល្អបំផុតរបស់ពិភពលោក៥សម័យកាល(Five times world player of the year)ដែលមានវ័យ ៣១ឆ្នាំរូបនេះ។