បាល់ទាត់៖ ក្រុមជម្រើសជាតិកម្ពុជាបានចាប់ផ្ដើម ធ្វើការប្រមូលផ្ដុំហ្វឹកហាត់ជាផ្លូវការហើយ កាលពីយប់ថ្ងៃទី០៣ ខែមិថុនា ស្របពេលបេក្ខភាពគូប្រជែងគឺក្រុមជម្រើសជាតិប៉ាគីស្ថាន ក៏បានធ្វើដំណើរមកដល់កម្ពុជាកាលពីយប់មិញផងដែរ ដើម្បីត្រៀមប្រកួតជម្រុះពានរង្វាន់បាល់ទាត់ពិភពលោកឆ្នាំ២០២២ នៅកាតា (2022 FIFA World Cup qualification-AFC) ជើងទី១ នាថ្ងៃទី០៦ ខែមិថុនាខាងមុខ។
បន្ទាប់ពីបង្ហាញបញ្ជីឈ្មោះកីឡាករ ១ថ្ងៃបន្ទាប់ពីចប់ការប្រកួតលីគកំពូលកម្ពុជាសប្ដាហ៍ទី១០ ក្រុមរហស្សនាមគោព្រៃកម្ពុជាមិនបង្អង់យូរនោះទេ គឺបានកោះហៅកីឡាករហ្វឹកហាត់តែម្ដង។ តែជាមួយគ្នាគេក៏ឃើញលោក Keisuke Honda អ្នកចាត់ការទូទៅក្រុមជម្រើសជាតិកម្ពុជា ដែលទើបចែកផ្លូវជាមួយក្លឹប Melbourne Victory នៃលីគកំពូលអូស្ត្រាលី បានបង្ហាញវត្តមានលើទីលាន AUPP ដើម្បីដឹកនាំការប្រកួតថ្ងៃដំបូងនេះដែរ។
គួរបញ្ជាក់ថា ជាមួយការប្រមូលផ្ដុំក្រុមជម្រើសជាតិកម្ពុជាលើកនេះ លោក Felix ដែលជាគ្រូបង្វឹកបានចម្រាញ់កីឡាករចំនួន ២៥នាក់ចេញពីក្លឹបចំនួន ១១ ក្នុងនោះមាន ១០ក្លឹបជាសមាជិកលីគកំពូលកម្ពុជា រួមមានព្រះខ័នរាជស្វាយរៀង, ណាហ្គាវើល, អង្គរថាយហ្គឺរ, បឹងកេត, វិសាខា, ក្រសួងការពារជាតិ, ភ្នំពេញក្រោន, គិរីវង់សុខសែនជ័យ, អគ្គិសនីកម្ពុជា និងយុវជនសាលាបាល់ទាត់ជាតិបាទី ខណៈមានម្នាក់ជាសមាជិកក្លឹបកំពូលម៉ាឡេស៊ីគឺកីឡាករ ធារី ចន្ថាប៊ីន។
បន្ទាប់ពីហ្វឹកហាត់បាន ៣ថ្ងៃ ពោលគឺនៅថ្ងៃទី០៦ ខែមិថុនា ក្រុមគោព្រៃកម្ពុជានឹងត្រូវបើកទ្វារពហុកីឡដ្ឋានជាតិ ទទួលក្រុមជម្រើសជាតិប៉ាគីស្ថានក្នុងជើងទី១ មុនជួបគ្នាជើងទី២ នាថ្ងៃទី១១ ខែដដែលលើទឹកដីប្រទេសកាតាដែលជាទឹកដីកណ្ដាល ដើម្បីកាត់សេចក្ដីរកក្រុមឈ្នះឡើងទៅជុំទី២ នៃពានរង្វាន់បាល់ទាត់ពិភពលោក ដែលប្រទេសកាតាទទួលបានសិទ្ធធ្វើម្ចាស់ផ្ទះ ជុំផ្ដាច់ព្រ័ត្រនាឆ្នាំ២០២២៕
ក្រុមជម្រើសជាតិកម្ពុជាចាប់ផ្ដើមប្រមូលផ្ដុំដឹកនាំផ្ទាល់ដោយ Honda ខណៈប៉ាគីស្ថានមកដល់យប់មិញ
អត្ថបទទាក់ទង
