ក្លិប Marseille បានចុះហត្ថលេខាជាមួយនឹងខ្សែប្រយុទ្ធអាហ្សង់ទីន Dario Benedetto ពីក្លិប Boca Juniors ក្នុងកិច្ចសន្យារយៈពេល៤ឆ្នាំ។ នេះបើយោងទៅតាមការប្រកាសរបស់ក្លិបស្ថិតក្នុងក្របខ័ណ្ឌ Ligue 1 មួយនេះ កាលពីថ្ងៃច័ន្ទ។ Benedetto វ័យ២៩ឆ្នាំ ដែលបានបង្ហាញខ្លួនជាអន្តរជាតិចំនួន៥លើក ចាប់តាំងពីបានបង្ហាញខ្លួនជាលើកទី១របស់គេក្នុងឆ្នាំ២០១៧ បានធ្វើឲ្យក្លិបរបស់បារាំងមួយនេះ ចំណាយប្រាក់ចំនួន១៦លានផោន (ស្មើនឹង១៧,៩លានដុល្លារអាមេរិក) ដើម្បីទិញយករូបគេ ។
រូបគេបានស៊ុតបាល់បញ្ចូលទី៣៩គ្រាប់ ក្នុងការប្រកួត៦៣លើកក្នុងរយៈពេល៣ឆ្នាំ ដោយបានឈ្នះពានក្របខ័ណ្ឌលីក២លើកជាមួយនឹងក្លិបយក្សអាហ្សង់ទីន Boca ក្រោយពីបានចំណាយពេលជាមួយនឹងក្លិប Tijuana និង Club America នៅប្រទេសម៉ិកស៊ិក និងក្លិប Gimnasa, Arsenal និង Defensa ក្នុងប្រទេសរបស់គេ។
បន្ទាប់ពីខ្សែការពារអេស្ប៉ាញ Alvaro Gonzalez រូបគេជាកីឡាករចំណូលថ្មីទី២របស់លោក Andre Villas-Boas នារដូវក្តៅនេះ បើគិតចាប់តាំងពីគ្រូបង្វឹកសញ្ជាតិព័រទុយហ្គាល់រូបនេះ បានចូលកាន់តំណែងជំនួសលោក Rudi Garcia នៅមុនពេលបើកយុទ្ធនាការថ្មី។ ក្លិបមានមូលដ្ឋាននៅកីឡាដ្ឋាន Velodrome មួយនេះ នឹងចាប់ផ្តើមរដូវកាលថ្មីរបស់ខ្លួនតាមរយៈការធ្វើជាម្ចាស់ផ្ទះទទួលក្រុម Reims នៅថ្ងៃសៅរ៍នេះ ក្នុងរដូវកាលទី៥របស់ពួកគេដោយការអវត្តមានពីក្របខ័ណ្ឌ Champions League៕
ប្រភពព័ត៌មាន៖ Channel News Asia
