បរទេស៖ លោក Ole Gunnar Solskjaer អ្នកចាត់ការទូទៅក្រុមបិសាចក្រហម Manchester United បានបញ្ជាក់ថាខ្សែការពារកណ្តាលលោក Harry Maguire នឹងនៅតែជាប់ឈ្មោះប្រធានក្រុមបន្តទៀត។ Maguire កីឡាកអន្តរជាតិអង់គ្លេសវ័យ២៧ ឆ្នាំត្រូវបានផ្តន្ទាទោសដាក់ពន្ធនាគារនៅលើកោះ Syros របស់ប្រទេសក្រិកចំនួន២១ខែគិតពីថ្ងៃឃុំខ្លួន បន្ទាប់ពីត្រូវបានរកឃើញថាជាប់ពិរុទ្ធពីបទប្រើអំពើហិង្សាលើសមត្ថកិច្ច និង អ្វីដែលកាន់តែធ្ងន់ធ្ងរទៀតនោះគឺរូបគេបានព្យាយាមប្រើគ្រប់មធ្យោបាយប្រឆាំងនឹងការចាប់ខ្លួននិងការប៉ុនប៉ងផ្តល់សំណូកម្តងហើយម្តងទៀតដល់ប៉ូលីសប្រទេសក្រិក។
ទោះយ៉ាងណាក្រោយពីតុលាការសម្រេចសាលក្រមរួចមក មេធាវី និង ក្លឹប Man.Utd បបានសម្រេចប្តឹងឧទ្ធរណ៍ប្រឆាំងនឹងសេចក្តីសម្រេចនេះដែលទុកជាមោឃភាពនូវការផ្តន្ទាទោស។ បន្ថែមលើភាពមន្ទិលសង្ស័យដែលអាចនិងមានអ្នកស្នងតំណែងប្រធានក្រុមថ្មី អ្នកចាត់ការទូទៅសញ្ជាតិន័រវវេ បានប្រាប់ MUTV ថា៖ គាត់នឹងនៅតែជាប្រធានក្រុមរបស់យើង ។ គាត់បានគ្រប់គ្រងវាយ៉ាងល្អហើយជាការពិតខ្ញុំនឹងនៅទីនេះដើម្បីគាំទ្រគាត់។ ដូច្នេះខ្ញុំពិតជាសង្ឃឹមថាយើងអាចឃើញ Harry បង្ហាញទម្រង់លេងបានល្អសម្រាប់ក្រុមនាពេល
ឆាប់ៗ”។
Maguire ត្រូវបានគ្រូបង្វឹកលោក Gareth Southgate ដកចេញពីក្រុមជម្រើសជាតិអង់គ្លេសកាលពីខែមុនប៉ុន្តែរូបលោកបញ្ជាក់ថាកំពុងរង់ចាំលទ្ធផលវិជ្ជមាន ពីខ្សែការពាររូបនេះនៅពេលប្រកាសសេចក្តីសម្រេចបណ្តឹងឧទ្ធរណ៏នៅខែតុលាខាងមុខបន្តទៀត។ Man Utd បានប្រកួតចាញ់ Aston Villa កាលពីថ្ងៃសៅរ៍ក្នុងជំនួបមិត្តភាពមុនពេលចាប់ផ្តើមការប្រកួតយុទ្ធនាការ Premier League របស់ពួកគេចាប់ផ្តើមប្រកួតជាមួយ Crystal Palace នៅថ្ងៃទី ១៩ ខែកញ្ញា២០២០ខាងមុខនេះ៕
