អនាគតរបស់ Lionel Messi កំពុងធ្វើឲ្យពិភពបាល់ទាត់រញ្ជួយ ខណៈនេះដែរអ្នកគាំទ្ររបស់ក្លឹប Stuttgart ម្នាក់បានប្រើវិធីសាស្ត្រមួយដើម្បីជួយក្លឹបអាចទិញបានតារារបស់ Barcelona ខាងលើ។ លោក Tim Artmann បានរៀបជាមូលនិធិមួយជាមួយគោលដៅ៩០០លានអឺរ៉ូ ដើម្បីព្យាយាមឲ្យក្លឹបស្ថិតក្នុងប្រទេសអាល្លឺម៉ង់ Stuttgart មានលទ្ធភាពអាចផ្ទេរយកកីឡាករសញ្ជាតិអាហ្សង់ទីន។ ៥ថ្ងៃចាប់តាំងពីបង្កើត គេទើបតែរកបាន២៦២អឺរ៉ូប៉ុណ្ណោះពីការបរិច្ចាគ។
ប៉ុន្តែ Artmann បានបញ្ជាក់ថា ប្រសិនបើគោលដៅមិនអាចសម្រេចបានទេឬ Messi សម្រេចទៅក្លឹបផ្សេង លុយដែលទទួលបាននឹងវេរទៅកាន់មនុស្សធម៌ផ្សេងៗ។ ក្រោយពីឃើញការបង្ហោះរបស់ Artmann ដើម្បីរកប្រាក់បែបនេះ ក៏មានអ្នកសរសើរចំពោះទឹកចិត្តនេះដែរដោយពួកគេនិយាយថា នេះជារឿងល្អដែលពួកគេបានឃើញ។
ថ្មីៗកន្លងទៅ La Liga បានចេញលិខិតបញ្ជាក់ថា Lionel Messi មិនអាចចាកចេញពីក្រុម FC Barcelona ដោយប្រើវិធីពិសេសរបស់ខ្លួនបាននោះទេ ក្រុមណាចង់បានត្រូវទិញផ្ដាច់កុងត្រា៧០០លានអឺរ៉ូ៕
