អ្នកចាត់ការក្រុម Liverpool លោក Jurgen Klopp បានក្រើនរំលឹកកូនក្រុមរបស់ខ្លួនអោយមានការប្រយ័ត្នប្រយែងខ្ពស់ចំពោះកីឡាករខ្សែប្រយុទ្ធ Aubameyang ចំពោះកីឡាកររហស្សនាម (ម៉ាស៊ីនរកគ្រាប់បាល់) សម្រាប់ការបើកកីឡាដ្ឋាន Anfield ទទួលភ្ញៀវ Arsenal នាថ្ងៃសៅរ៍ទី២៤ សីហា ២០១៩នេះនៅវេលាម៉ោង១១:៣០នាទី។គួររំលឹកថា Liverpool និង Arsenal គឺជាក្រុមដែលមិនទាន់ស្គាល់ចាញ់គឺឈ្នះ២ប្រកួតដូចគ្នាក្រោយចាប់ផ្តើមរដូវកាលថ្មី Premier League (២០១៩-២០២០)ចំនួន ២ លើករបស់ពួកគេ។
គ្រូបង្វឹកសញ្ជាតិអាឡឺម៉ង់លោក Jurgen Klopp និង ខ្សែប្រយុទ្ធ Aubameyang ធ្លាប់ធ្វើការរួមគ្នា ២ រដូវកាលនៅក្លឹប Borussia Dortmund មុនពេលលោក Klopp ផ្ទេរមកកីឡាដ្ឋាន Anfield ក្នុងឆ្នាំ ២០១៥ ខណៈកីឡាករអន្តរជាតិហ្គាបុងផ្ទេរមកកីឡាដ្ឋាន Emirate Stadium នៅខែមករា ឆ្នាំ ២០១៨ និងនៅតែបង្ហាញទម្រង់លេងល្អក្រោយផ្លាស់មកក្របខណ្ឌ Premier League ដោយស៊ុតបញ្ចូលទីបាន ៤៣ គ្រាប់ក្នុង ៦៧ ប្រកួត។
លោក Klopp បានផ្តល់បទសម្ភាសន៏ដោយបញ្ជាក់យ៉ាងខ្លីថាៈគាត់ជាខ្សែប្រយុទ្ធដ៏គ្រោះថ្នាក់ម្នាក់ ព្រមជាមួយល្បឿនលឿន ឥឡូវនេះគាត់អាចលេងល្អបំផុតនៅទម្រង់ ៤-២-៣-១ ដែលមានន័យថាខ្សែប្រយុទ្ធតិចជាងបម្រើ-ការពារប៉ុន្តែយើងក៏មិន អាចមើលស្រាលពួកគេបានដែរ ។
