កីឡាករប្រដាល់សកលអាជីពខ្មែរ-អាមេរិក Eric Pieroun Pen ដែលទើបឈ្នះខ្សែក្រវាត់ពិភពលោក WBA Asia នៅវៀតណាម កាលពីខែឧសភា ២០១៩ កន្លងទៅនេះបានមកដល់កម្ពុជាតាំងពីម្សិលមិញមកម្ល៉េះ។
Eric Pieroun Pen បានឲ្យដឹងមុននេះថា នេះជាលើកទី១ហើយ ដែលរូបគេបានមកដល់ទឹកដីឈាមជ័ររបស់ខ្លួន និងមានចិត្តសប្បាយរីករាយជាខ្លាំង ដោយបានការស្វាគមន៍ពីប្រជាជនខ្មែរនៅទីនេះទៀតផង។ ម្ចាស់ខ្សែក្រវាត់ WBA Asia រូបនេះលើកឡើងទៀតថា ខ្លួនចង់មកលេងកម្ពុជាជាយូរហើយប៉ុន្តែមិនមានឱកាសទើបតែលើកនេះទេបានមកលេង ប៉ុន្តែក៏មិនបានយូរ ហើយអាចទៅប្រាសាទអង្គរនោះឡើយព្រោះពេលខ្លី។
អ្នកប្រដាល់សកលខ្មែរ-អាមេរិកខាងលើនេះ បន្ថែមទៀតថា កាលពីជ័យជម្នះនៅឯប្រទេសវៀតណាមកន្លងទៅនេះ រូបគេក៏ទទួលដំណឹងថាខាងប្រជាជនកម្ពុជាសប្បាយចិត្ត និងគាំទ្រផងដែរ ប៉ុន្តែមិនបានដឹងថាមានការគាំទ្រខ្លាំងតាមបណ្ដាញសង្គម ឬប្រព័ន្ធផ្សព្វផ្សាយអេឡិចត្រូនិកបែបនេះទេ។ កីឡាករវ័យ២៦ឆ្នាំរូបនេះ ក៏សូមថ្លែងអំណរគុណជាខ្លាំងដល់ប្រជាជនកម្ពុជាទាំងអស់ដែលបានជួយគាំទ្រសម្រាប់ជ័យជម្នះកាលនៅវៀតណាមនេះ។ លោកក៏មានបំណងចង់មកជួយខាងផ្នែកប្រដាល់សកលកម្ពុជាដែរ បើមានការផ្ដល់ឱកាសណាមួយនៅពេលបន្ទាប់ពីនេះ។
រំលឹកដែរថា កីឡាករប្រដាល់សកលអាជីព ខ្មែរ-អាមេរិក Eric Pieroun Pen ជាម្ចាស់ខ្សែក្រវាត់ពិភពលោក WBA Asia។ កីឡាកររូបនេះមកលេងកម្ពុជា ក៏ដូចជាមកក្លឹបប្រដាល់ Cambodian Top Team នេះតាំងពីម្សិលមិញមកម្ល៉េះ ហើយនឹងត្រូវវិលត្រលប់ទៅក្លឹបប្រដាល់របស់ខ្លួននៅឯវៀតណាមវិញនៅថ្ងៃស្អែក៕
វីដេអូប្រកួត៖
Credit: Sabay
