អ្នកប្រដាល់មកពីខេត្តកំពង់ឆ្នាំង ធន់ មករា ឬ តាញ់ មករា មួយរយៈពេលចុងក្រោយនេះ គឺសមត្ថភាពកើនឡើងខ្លាំងមែនទែន ផ្ដួលដៃគូ និងឈ្នះពិន្ទុជាហូរហែតាមសង្វៀនផ្សេងៗ។
កូនសិស្សលោក ធន់ សុភា ធ្វើឲ្យអ្នកនិយមតាមដានប្រដាល់ចាប់អារម្មណ៍ជាខ្លាំង តាមរយៈការប្រកួតមិត្តភាពពីសង្វៀនមួយទៅសង្វៀនមួយទៀត ភាគច្រើនគឺយកឈ្នះកីឡាករថៃដោយផ្ដួលឲ្យសន្លប់។ ខណៈអ្នកប្រដាល់ខាងលើនេះមានឈ្មោះក្នុងកម្មវិធីខ្សែក្រវាត់មាសរបស់ PNN ផងនោះ រឹតតែធ្វើឲ្យរូបគេមានទឹកចិត្តហ្វឹកហាត់កាន់តែខ្លាំងជាងមុនទៅទៀត។
កីឡាករវ័យរូបនេះអាចចេញបានគ្រប់ស្នៀត គេឃើញ មករា ចូលចិត្តទាត់ភ្លៅ និងឆក់ទាត់លើបានល្អ ចំណែកជង្គង់បោះក៏គ្រោះថ្នាក់ និងមានប្រសិទ្ធភាពផងដែរ។ បើកណ្ដាប់ដៃ ក៏ឃើញចេញបានច្រើនដែលពេលប្រកួតម្ដងៗ រីឯស្នៀតកែងមិនសូវជាប្រើប៉ុន្មានទេ ម្ចាស់មេដាយមាសជើងឯកថ្នាក់ជាតិរូបនេះ ចូលចិត្តវ៉ៃប្រយោល ជាជាងអោបចាប់ឡាំ។
តាញ់ មករា ជាអ្នកប្រដាល់មកពីសមាគមក្រសួងការពារជាតិ ជាកូនសិស្សលោកគ្រូ ធន់ សុភា និងលោកគ្រូ តឹក ឡៃ។ ប្រកួតចុងក្រោយរបស់គេ ផ្ដួលថៃឲ្យសន្លប់ក្នុងទឹកទី៣ នៅសង្វៀនបាយ័នស្ទឹងមានជ័យ កាលពីថ្ងៃសុក្រ សប្ដាហ៍មុន។ អ្នកប្រដាល់រូបនេះជាម្ចាស់ពានរង្វាន់ TV5 ទម្ងន់ ៥៧គីឡូក្រាម ជាម្ចាស់មេដាយមាសជើងឯកថ្នាក់ជាតិឆ្នាំ២០១៨ ជាជើងឯករង ពានរង្វាន់ ISI និងជាម្ចាស់មេដាយសំរឹទ្ធិកីឡាជាតិលើកទី២ ផងដែរ។ ឥលូវនេះគេជាបេក្ខភាពប្រកួតជម្រុះដណ្ដើមខ្សែក្រវាត់មាស នៅ PNN ថែមទៀតផង៕
តាញ់ មករា បង្ហាញទម្រង់វ៉ៃល្អណាស់ ជាពិសេសការវ៉ៃប្រយោលដែលមានគ្រប់ស្នៀត
អត្ថបទទាក់ទង
