អ្នកលេងគុនថៃ ស៊ីបម៉ឺន ទើបតែយកឈ្នះជើងខ្លាំងរបស់កម្ពុជា១រូបទៀតហើយ គឺកីឡាករ ម៉ឺន សុភា កាលពីថ្ងៃសុក្រ សប្ដាហ៍មុននេះ ក្នុងកម្មវិធីគូបូតា របស់បាយ័ន។ ឈ្នះ ម៉ឺន សុភា មិនមែនជារឿងធម្មតានោះឡើយ ចុះកីឡាករខ្មែររូបណាដែលមានសមត្ថភាពទប់ទល់ ឬកំដរថៃម្នាក់នេះបាន?
ស៊ីបម៉ឺន(ខៀវ)
មែនទែនទៅបើកុំមានការបញ្ហាក្នុងការចាប់គូនោះទេ គឺជើងខ្លាំងរបស់ប្រទេសថៃ ខាងលើនេះត្រូវប្រកួតជាមួយ ដៃភ្លើង ជើងរន្ទះ រឿង សោភ័ណ្ឌ នៅសង្វៀនទូរទស្សន៍ PNN កាលពីថ្ងៃអាទិត្យ ទី២ មិថុនា ប៉ុន្មានថ្ងៃមុននេះទៅហើយ។
សម្រាប់ប្រិយមិត្តប្រដាល់របស់កម្ពុជាមួយចំនួនចង់ឲ្យជួបកីឡាករ កែវ រំចង់ ព្រោះល្បីថាកីឡាករ ស៊ីបម៉ឺន នេះពូកែឌឺដាក់គេ ដូច្នេះជួបអ្នកប្រដាល់មកពីបាត់ដំបង បែបសមគ្នា ដោយសារចេះឌឺទៅឌឺមកមិនឲ្យចាញ់ចិត្តនោះទេ។
ម៉ឺន សុភា ប៉ះ ស៊ីបម៉ឺន
បើនិយាយពីទម្ងន់ កាយសម្បទា និងស្នៀតប្រយុទ្ធរបស់ ស៊ីបម៉ឺន វិញគឺល្អទាំងព្រមតែម្ដង។ កម្ពស់ប្រហែល១,៧៥m-១,៧៦m ឡើងទៅ មានមាឌធំ សាច់ដុំកងៗ រីឯទម្ងន់វិញចន្លោះ ៧១-៧២គីឡូក្រាម។ សមត្ថភាពគឺធ្លាប់ឈ្នះកីឡាករ កងមឿងឆាង ឈ្នះ រ៉ារឿង ពីមុនមកទៀតផង។ ស្នៀតចេញធ្ងន់ៗ ទាត់ខ្លី ទាត់លើ កណ្ដាប់ដៃ និងចេះបត់កែងបានល្អទៀតផង និយាយរួមស្នៀតអាចចេញបានទាំងអស់។
ស៊ីបម៉ឺន ពេលឈ្នះ គឹម វាសនា
ចំណែកកីឡាករកម្ពុជាដែលមានមាឌធំ ឬកម្ពស់ខ្ពស់ ទម្ងន់ប្រហាក់ប្រហែល ស៊ីបម៉ឺន បច្ចុប្បន្ននេះ គឺ ព្រំ សំណាង ដូច្នេះអាចលេងគ្នាបានហើយ ទាំងជង្គង់ និងកណ្ដាប់ដៃ ឬកែងគឺប្រហាក់ប្រហែលគ្នាតែម្ដង។ បើ ឡុង សុភី វិញក៏មានកម្ពស់ប្រហាក់ប្រហែលផងដែរ ប៉ុន្តែមាឌនៅតូចជាង និងស្ទើរកម្លាំងជាង ស៊ីបម៉ឺន បន្តិច។ ចំពោះ កែវ រំចង់ វិញទម្ងន់គឺប្រហាក់ប្រហែលគ្នា និងកីឡាករថៃខាងលើដែរ បទពិសោធ ស្នៀតសម្លាប់គឺអាចទប់ទល់គ្នាបាន ប៉ុន្តែខ្លាចចាញ់រឿងកម្លាំងបន្តិច។
និយាយដល់ រឿង សោភ័ណ្ឌ វិញ គឺចាញ់កម្ពស់ ស៊ីបម៉ឺន ដាច់ ប៉ុន្តែអ្នកលេងគុនខ្មែររូបនេះធ្លាប់វ៉ៃអ្នកខ្ពស់ៗជាងខ្លួនឲ្យសន្លប់ច្រើននាក់មកហើយ។ បទពិសោធ តិចនិក ភាពវ៉ៃឆ្លាត សោភ័ណ្ឌ មានទាំងអស់ ដូច្នេះអាចលេងគ្នាបាន តែនៅបារម្ភលើរឿងចាញ់ជង្គង់ និងកម្លាំង ព្រោះឃើញ ស៊ីបម៉ឺន គេអាចវ៉ៃពេញ៥ទឹកល្អជាមួយ ម៉ឺន សុភា កន្លងទៅថ្មីៗនេះ ខណៈកូនសិស្សលោក ឈិន ក្វាន់ចៃ ច្រើនឆាប់អស់មុនទឹក។
ម៉ឺន សុភា ចាញ់ ស៊ីបម៉ឺន
រំលឹកដែរថា កីឡាករថៃ ស៊ីបម៉ឺន មកប្រកួតនៅកម្ពុជា២ដង ទី១ ទាត់ផ្កាប់ចាន គឹម វាសនា ឲ្យសន្លប់ក្នុងទឹកទី១ នៅសង្វៀន TV5 កាលពីថ្ងៃទី១៨ ឧសភា ២០១៩។ លើកទី២ ឈ្នះពិន្ទុកីឡាករ ម៉ឺន សុភា កាលពីថ្ងៃទី៣១ ខែឧសភា ២០១៩ នៅសង្វៀនបាយ័នស្ទឹងមានជ័យ៕
វីដេអូប្រកួតរវាង ស៊ីបម៉ឺន ប៉ះ គឹម វាសនា៖
Credit: Sabay
បើ ម៉ឺន សុភា ក៏ទើបចាញ់ដែរតើមានអ្នកប្រដាល់រូបណាទើបសម ស៊ីបម៉ឺន (ថៃ) ជាងគេ
អត្ថបទទាក់ទង
