រូបភាពឡូហ្គោផ្លូវការសម្រាប់ព្រឹត្តិការណ៍ FIFA World Cup ឆ្នាំ២០២២ ក្នុងប្រទេសកាតា ត្រូវបានដាក់បង្ហាញ ក្នុងរដ្ឋធានីដូហា កាលពីថ្ងៃអង្គារ។ ការប្រកាសបង្ហាញពីរូបភាពឡូហ្គោនេះ ត្រូវបានធ្វើឡើងនៅម៉ោង ៨:២២ ម៉ោងក្នុងស្រុក ខណៈដែលអ្នកគាំទ្ររាប់ពាន់នាក់ បានប្រមូលផ្តុំគ្នាដើម្បីធ្វើជាសក្ខីភាពនៃការបង្ហាញរូបភាពឡូហ្គោនេះ ដែលត្រូវបានដាក់តាំងបង្ហាញនៅតាមអគារដ្ឋាភិបាលជាច្រើនក្នុងទីក្រុងដូហា។

រូបភាពឡូហ្គោនេះ ក៏ត្រូវបានបង្ហាញក្នុងទីក្រុងធំៗចំនួន២៤ផ្សេងទៀតទូទាំងពិភពលោក ផងដែរ ក្នុងនោះរាប់បញ្ចូលទាំងទីក្រុងឡុងដុង Johannesburg, Mexico City, Mumbai, Paris និង Seoul។ រូបភាពឡូហ្គោនេះ គឺជារចនាតាមបែបអារ៉ាប់ ដោយរចនាជារូបភាពកន្សែងខ្វែងជារង្វង់ពណ៌សដែលមិនប្រកាន់ពីភេទ និងមានរូបរាងជាលេខ៨ តំណាងឲ្យភាពគ្មានទីបញ្ចប់ ស្របពេលដែលក៏មានការរចនាជារូបរាំងបេះដូងនៅពីលើពាក្យ FIFA WORLD CUP Qatar 2022 ផងដែរ៕