អ្នកប្រដាល់របស់ប្រទេសកម្ពុជាយើង កំពែង ខ្មៅ វ៉ៃគ្នាប្ដូរខ្លាំងមែនទែន ត្រឹមពីរទឹកប៉ុណ្ណោះម្នាក់ៗប្រើកែងមិនដឹងប៉ុន្មាននោះទេ ខណៈអ្នកទស្សនាជក់ចិត្ត និងស្រៀវជំនួសកីឡាករកំពុងប្រកួតទៅទៀត។
ជើងខ្លាំងវ័យក្មេងរបស់កម្ពុជា កំពែង ខ្មៅ ចិត្តសឿង និងមិនខ្លាចញញើតដៃគូដែលជាម្ចាស់ផ្ទះនោះទេ ពោលបើកការប្រយុទ្ធតាំងតែពីទឹកទី១តែម្ដង។ ជើងខ្លាំងរបស់កម្ពុជារូបនេះ ព្យាយាមចេញអាវុធមុនជានិច្ច ខណៈកីឡាករថៃ Chaichana វ៉ៃមកភ្លាម កំពែង ខ្មៅ សងវិញភ្លាមដូចគ្នា។ ទាំងកណ្ដាប់ដៃ រន្ទះជើង និងជង្គង់ សុទ្ធតែពួកគេយកមកប្រើតទល់គ្នាតាំងពីពាក់កណ្ដាលទឹកទី១ទៅតែម្ដង។
សល់១នាទីចុងក្រោយនៃទឹកទី១ កីឡាករម្ចាស់ផ្ទះថៃ ត្រូវគ្រូពេទ្យពិនិត្យមើលរបួសបែកចិញ្ចើមស្ដាំម្ដង ព្រោះឃើញហូរឈាមច្រើនគួរសម ប៉ុន្តែយ៉ាងណាក៏អាចបន្តការប្រកួតជាធម្មតារហូតបញ្ចប់ទឹកទី១នេះ។
ចូលទឹកទី២ កំពែង ខ្មៅ និង Chaichana ប្ដូរកែងគ្នារឹតតែខ្លាំង ពោលមានកែងបុកកប៉ាល់ផង កែងបត់អស់មួយជំហរផង ម្នាក់ៗវ៉ៃប្ដូរដើម្បីផ្ដួលគ្នារៀងៗខ្លួន តែចុងក្រោយម្ចាស់ថៃមិនអាចទប់និងទម្ងន់កែងរបស់អ្នកលេងគុនខ្មែរបាននោះទេ គឺត្រូវសន្លប់ចុងទឹកនៅនាទី ០,៥០វិនាទីតែម្ដងទៅ។ ចំណែកអ្នកទស្សនាផ្ទាល់ខ្លះភ័យស្រៀវ និងការប្ដូរកែងយ៉ាងសាហាវរបស់ពួកគេនាការប្រកួតដណ្ដើមពានរង្វាន់ Super Champ។
រំលឹកដែរថា កីឡាករ កំពែង ខ្មៅ របស់កម្ពុជាបានផ្ដួលកីឡាករម្ចាស់ផ្ទះថៃ Chaichana ឲ្យសន្លប់ក្នុងទឹកទី២ នៃការប្រកួតដណ្ដើមពានរង្វាន់របស់សង្វៀន Super Champ។ សរុបលទ្ធផលកីឡាករទាំង៧គូម្សិលមិញនេះគឺ យ៉េន ឌីណា ស្មើពិន្ទុថៃ ទិត្យ សុវណ្ណគីរី ចាញ់សន្លប់ថៃទឹក១ ព្រឿង សុជាតិ ស្មើពិន្ទុថៃ ហ៊ឹម សេរី ឈ្នះសន្លប់ទឹក២ វ៉ាន់ វឿន ចាញ់សន្លប់ថៃទឹក២ រិទ្ធ ភូលូ ចាញ់ពិន្ទុថៃ ចំណែក កំពែង ខ្មៅ ឈ្នះសន្លប់ទឹក២៕
វីដេអូប្រកួត៖
អ្នកប្រដាល់កម្ពុជា កំពែង ខ្មៅ វ៉ៃប្ដូរកែងគ្នាផ្តួលកីឡាករថៃ Chaichana សន្លប់ចុងទឹក
អត្ថបទទាក់ទង
